MWALIMU WA MAISHA

Huyu ni mwalimu wa namna yake. Anatokea katika mwanzo wa uhai wa viumbe husika. 

Yeye ndiye anayepokea Elimu ya Kiutu maarifa halisi ya kuishi, ya kuunganisha, na ya kuelewa maana ya uwepo.

Kwa binadamu, mwalimu huyu wa kwanza alikuwa ni MTU wa mwanzo yule aliyepewa program kamili ya maisha na taratibu zake.

Tangu hapo, vizazi vimeendelea kuishi kwa mihula mingi ya mizunguko ya maarifa. 

Lakini katika kila kizazi, hufika wakati ambapo roho za watu huanza kuchoka na maarifa ya kurithi, na hapo ndipo mwalimu wa pili hujitokeza.

Huyu si mwalimu wa vitabu, bali ni mwalimu wa ufunuo. Hupokea mwaliko kutoka kwa roho za kale - wale waliobeba dira ya kwanza ya utu, walioishi kabla ya maandiko, kabla ya dini, kabla ya falsafa.

Mwalimu huyu hupatikana kwa nadra sana -katika vipindi vya kihistoria ambapo akili za watu huanza kuamka kutoka usingizi wa kawaida.

Ni zaidi ya msomi, zaidi ya mfasiri wa maandiko, zaidi ya mjuzi wa vitabu.

Ni mtu aliyechaguliwa na roho za kale ili kuleta usahihi wa kuishi, kurejesha mwongozo wa awali wa nafsi na utu.

Hufundisha kwa ufunuo, si kwa vitabu.

Maarifa yake hayazaliwi katika maktaba, bali hutoka kwenye ukimya wa ndani - mahali ambapo sauti ya hekima hunong’ona.

Huongozwa na miito ya roho za mababu na vizazi, kwa nuru inayopita maneno. 

Roho hizo humletea mwanga wa kale: mwanga ambao haupotei, hauchujwi na tamaduni, wala haupimwi kwa itikadi.

Ni nuru isiyopatikana chuoni, bali moyoni.

Hafundishi kwa tamaa ya umaarufu au sifa.

Hafundishi kwa kulazimisha watu waamini, bali huamsha ndani yao mwali wa kutaka kujua.

Huwasha akili, moyo, na roho kwa pamoja - huku akiwavuta wanafunzi wake kuona zaidi ya mipaka ya imani, dini, au falsafa.

Huyu ndiye mwalimu anayekufunulia ajenda za Mungu wa kweli: Mungu ambaye si kiumbe, hakuumbika, hana umbo, hana jinsia, hana mipaka ya dini wala ya makundi.

Si mzee wa mbinguni, si sauti, si nafsi anayezungumza, si bwana wala mama.

Yuko zaidi ya majina yote.

Mungu ni UWEPO - uwepo usioelezeka kwa maneno, usiopimika kwa vipimo vya watu; uwepo ambao kila chenye uhai na kisicho hai kipo kwa sababu yake.

Ndiyo nguvu inayopitisha pumzi katika kila kiumbe, inayounganisha vilivyotengana, inayofanya maisha yawe kitu kimoja.

Mwalimu huyu hufundisha mambo yaliyokuwepo kabla ya mbingu kuumbwa.

Hana lengo la kukujibu “Mungu ni nani,” bali “Mungu ni nini.”

Na hapo ndipo siri ya maisha huanza kufunguka - kwamba ukweli hauko mbali, uko ndani ya uwepo wako.

Ukikosa mwalimu huyu, umekosa msingi wa kweli wa kuishi.

Kwa sababu elimu anayoitoa si ya vichwa, bali ya mioyo. Si ya madarasa, bali ya roho. Ni elimu inayojenga utu, maadili, na kusudi la kweli la maisha.

Elimu hii haikuachi ukiwa na majibu ya mitihani, bali hukujaza hekima ya kuishi kwa utulivu wa ndani, kwa umoja na upendo.

Ni elimu inayowekwa ndani ya mtu na roho za waliotutangulia - wale waliopita katika maumivu, kuona mengi, na sasa wanatoa mwanga wao kupitia waliowekwa kama vyombo vyao.

Mwalimu huyu huleta habari za Mungu mwenye vyote kwa ulimwengu mzima, akifungua macho ya watu kuelewa kuwa sote ni sehemu ya uhai mmoja unaoitwa UWEPO.

Swali ni hili: 

Mwalimu wako ni wa kundi gani?

Na wewe, uko tayari kweli kujifunza kutoka kwa Mwalimu wa Maisha - yule anayefundisha kutoka kwenye sauti ya ukimya?

Au unataka ubaki kwenye siasa za Kiroho?

Ndimi: Mbulwa King'ung'e

📞 Mawasiliano: 0744 284 329